
香巴噶舉教言集NG11ནི་གུའི་ཡན་ལག་ལུས་སེམས་འཆི་མེད་ཀྱི་ཁྲིད་བཞུགས་སོ།།
1-134
༄༅། །ནི་གུའི་ཡན་ལག་ལུས་སེམས་འཆི་མེད་ཀྱི་ཁྲིད་བཞུགས་སོ།།
༄། །སྔོན་འགྲོ།
༄༅། །ནི་གུའི་ཡན་ལག་ལུས་སེམས་འཆི་མེད་ཀྱི་ཁྲིད་བཞུགས་སོ།། ན་མོ་གུ་རུ། འདིར་ཉིང་ཁུའི་ཡན་ལག་ལུས་སེམས་འཆི་མེད་མན་ངག་གི་ཁ་བསྐངས་ཏེ་ཉམས་སུ་ལེན་པ་ལ་འཁྲུལ་འཁོར་སུམ་
ཅུ་རྩ་གཉིས་ཀྱིས་རྩ་ཐིག་རླུང་གསུམ་སྦྱངས་ནས། གདན་བདེ་བ་ལ་ལུས་གནད་ཙོག་པུ་སྐྱིལ་ཀྲུང་གང་བདེ་བྱས་ལ། སྐྱབས་འགྲོ་སེམས་བསྐྱེད་བླ་མའི་རྣལ་འབྱོར་རྣམས་སྔོན་དུ་བཏང་ནས་འདི་ལྟར་བསམ་
པར་བྱ་སྟེ། འཆི་ཞེས་པ་འདི་ལུས་འཆིའམ་སེམས་འཆི། ལུས་འཆིའོ་སྙམ་ན། རྣམ་སྨིན་གྱི་ལུས་འདི་འཆིའམ་བག་ཆགས་ཀྱི་ལུས་འཆི། དང་པོ་ལྟར་ཡང་མིན་ཏེ་ལུས་འདི་ཤ་ཁྲག་རྒྱུས་པ་ལྤགས་པ་
སོགས་ཚོགས་པའི་བེམ་པོ་ཁོ་ན་ཡིན་པས་དེ་ལ་འཆི་བ་ག་ལ་ཡོད། ཡོད་ན་རྡོ་སོགས་ཀྱང་ཅིའི་ཕྱིར་མི་འཆི། བག་ཆགས་ཀྱི་ལུས་ཀྱང་མི་འཆི་སྟེ། འཆི་ན་རྨི་ལམ་དུ་ཤི་བས་
འཆི་བའི་གོ་ཆོད་དགོས། དེ་ལྟར་ན་རྨི་ལམ་དུ་ཤི་བ་རྨིས་པའི་གང་ཟག་དེ་དག་གཉིད་མི་སད་དགོས་ཏེ་ཤི་ཟིན་པས་སོ་སྙམ་དུ་བསམ་ཞིང་། མདོར་ན་སྔོན་གྱི་ལས་ཀྱི་འཕེན་པ་
ཟད་ནས་རྣམ་སྨིན་གྱི་ལུས་འདི་ལ་སེམས་མ་གནས་པ་ཙམ་ལ་འཆི་བ་ཞེས་བརྟགས་པ་ཡིན་གྱི་འཆི་བ་ཞེས་པ་དོན་ལ་མ་གྲུབ་བོ་ཞེས་བསམ་ཞིང་ལུས་འཆི་མེད་དུ་ནམ་གཏན་ལ་འབེབས་འབེབས་བསྒོམ་པར་བྱའོ། །
1-135
སེམས་འདི་འཆིའོ་སྙམ་ན་དེ་ལ་སེམས་འཆི་མེད་རང་འགྲོལ་ཞེས་བྱ་བའི་གདམས་པ་ཁྱད་པར་ཅན་འདི་ཉམས་སུ་ལེན་པ་ལ། སྐྱབས་འགྲོ་སེམས་བསྐྱེད་སྔོན་དུ་བཏང་ནས་རང་སྐད་ཅིག་གིས་པདྨ་ཉི་
མ་འཇིགས་བྱེད་དང་དུས་མཚན་མའི་སྟེང་དུ། འཁོར་ལོ་སྡོམ་པ་སྐུ་མདོག་སྔོན་པོ་ཞབས་གཡས་བརྐྱངས་པས་དུས་མཚན་མའི་ལྟོ་བ་མནན་པ། གཡོན་བསྐུམས་པས་འཇིགས་བྱེད་ནག་པོའི་མགོ་བོ་བལྟབས་ནས་མནན་
པ། ཞལ་གཅིག་ཕྱག་གཉིས་པ་སྤྱན་གསུམ་ལྡན་ཞལ་འགྱུར་ཞིང་མཆེ་བ་གཙིགས་པ། རལ་པའི་ཐོར་ལྕོག་སྤྱི་བོར་བཅིངས་པའི་རྩེ་མོར་རིན་པོ་ཆེ། གཡོན་ན་ཚེས་གཅིག་གི་ཟླ་བ་འཚོག་མའི་སྟེང་ན་
སྣ་ཚོགས་རྡོ་རྗེ་ཕྱག་གཉིས་ཀྱིས་རྡོར་དྲིལ་འཛིན་པས་ཡུམ་ལ་འཁྱུད་པ། མི་མགོ་སྐམ་པོ་ལྔའི་དབུ་རྒྱན། རློན་པ་ལྔ་བཅུའི་དོ་ཤལ་རུས་པའི་རྒྱན་དྲུག་དང་ལྡན་པ། སྟག་གི་ལྤགས་པའི་ཤམ་
ཐབས་གྲོལ་བ་གར་དགུའི་ཉམས་དང་ལྡན་པ། དེའི་པང་ན་ཡུམ་རྡོ་རྗེ་ཕག་མོ་དམར་མོ་གཡས་གྲི་གུག་གིས་གདུག་པ་ཅན་སྡིགས་ཤིང་། གཡོན་ཐོད་ཁྲག་འཛིན་པས་ཡབ་ལ་འཁྱུད་པ་གཅེར་བུ་སྤྱན་
གསུམ་སྐྲ་གྲོལ་བ། སྐུ་ཤ་རྒྱས་ཤིང་ནུ་མ་འབུར་བ་ཐོད་སྐམ་གྱི་དབུ་རྒྱན་དང་དོ་ཤལ་ཅན། རུས་རྒྱན་ལྔ་ལྡན་ཞབས་གཡོན་བརྐྱངས་ཤིང་གཡས་བསྐུམས་པས་ཡབ་ལ་འཁྲིལ་བ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པ་གཅིག་གསལ་བར་སྒོམས། 
1-136
དེའི་སྤྱི་བོར་བླ་མ་བསྒོམ་ལ་གསོལ་བ་གདབ་བོ། །དེ་ནས་ཉམས་ལེན་ལ་འཇུག་པ་ལ་གསུམ་སྟེ། དང་པོ་སྔོན་འགྲོ་ནི། ཡབ་ཀྱི་སྤྱི་བོའི་སྐྲ་མཚམས་སུ་ལྷ་སྐུ་ཤིན་ཏུ་གསལ་བ་དེ་
ཡང་མགོ་བོ་སོ་སོར་བྱེད་པའི་ཧཱུྃ་སྔོན་པོ་འོད་ཟེར་འཕྲོ་བ་གཅིག་བསམ། དེ་ནས་ཧཱུྃ་ལས་འོད་བྱུང་བས་སྨིན་མཚམས་ཡན་ཆད་གསལ་སིང་སོང་། དེ་ནས་ཤངས་ཡན་སྤྱན་རྩ་ཚུན་གསལ་བའི་སྤྱན་
གསུམ་ཧྲིག་ཧྲིག་པ། དེ་ནས་རིམ་བཞིན་མགྲིན་པ། ཐུགས་ཁ་ལྟེ་བ་གསང་གནས་ཀྱི་སྦྱོར་མཚམས་ཡན་ཆད། དེ་ནས་པུས་མོ་ལོང་བུ་སོར་མོའི་སེན་མོ་ཕན་ཆད་གསལ་སིང་བ་བྱུང་བྱུང་བསྒོམ། ཡབ་
ཀྱི་ཕྱི་སྦྱངས་པའོ། །དེ་ནས་ཡང་ཧཱུྃ་ལས་འོད་ཟེར་སྔོན་པོ་བྱུང་ཚངས་བུག་ན་མར་སོང་བས་ཤངས་དང་མགྲིན་པ་ཡན་ཆད་སྔོ་སང་སོང་། དེ་ནས་ཐུགས་ཁ་ལྟེ་བ་གསང་གནས་པུས་མོ་ལོང་
བུ་སོར་མོའི་ནང་ཡན་ཆད་སྔོ་སིང་བ་འོད་ཀྱི་རང་བཞིན་དུ་བསྒོམ། ཡབ་ཀྱི་ནང་སྦྱངས་པའོ། །དེ་བཞིན་དུ་ཡུམ་གྱི་སྤྱི་བོའི་སྟེང་གི་སྐྲ་མཚམས་སུ་བཾ་དམར་པོ་འོད་ཟེར་དམར་པོ་འཕྲོ་
བ་གཅིག་བསམ། དེ་ལས་འོད་ཟེར་དམར་པོ་བྱུང་གོང་བཞིན་ཡུམ་གྱི་ཕྱི་ནང་གཉིས་སུ་སྦྱངས་ཁྱད་པར་བྷ་ག་དང་ནུ་མ་དམར་སང་ངེ་བསྒོམས་པ་ནི་ཁ་དོག་གསལ་འདེབས་སོ། །དེ་ནས་ཡབ་ཀྱི་སྤྱན་དབུས་མ་ནས་རིམ་བཞིན་གསལ་འདེབས། 
1-137
རལ་པའི་ཐོར་ལྕོག་རྡོར་དྲིལ་འཛིན་ལུགས། ཞལ་མཆེ་བ་གཙིགས་པ་ཞབས་ཀྱི་འཆང་སྟབས་སྒེག་པ་མེ་དཔུང་ལ་སོགས་པ་དེ་རེ་རེ་ནས་གསལ་འདེབས་པ་ནི་དབྱིབས་བསྒོམ་པའོ། །དེ་བཞིན་དུ་ཡུམ་ལ་
ཡང་དབྱིབས་རེ་རེ་ནས་བསྒོམ། དེ་ནས་ཡབ་ཀྱི་སྤྱི་བོའི་ནོར་བུ་ཟླ་ཕྱེད་སྣ་ཚོགས་རྡོ་རྗེ་འཁོར་ལོ་རྣ་ཆ་མགུལ་རྒྱན། གདུ་བུ་སྐེ་རགས་ཐལ་ཆེན་རེ་རུས་པའི་རྒྱན་དྲུག མི་མགོ་སྐམ་
རློན་གྱི་དབུ་རྒྱན་དང་དོ་ཤལ། ཡུམ་ལའང་ཐལ་ཆེན་མ་གཏོགས་པའི་རུས་རྒྱན་ལྔ་མགོ་སྐམ་གྱི་དབུ་རྒྱན་དང་དོ་ཤལ་སོགས་རིམ་བཞིན་བསྒོམས་པ་ནི་རྒྱན་གསལ་འདེབས་སོ། །དེ་ལྟ་བུའི་ཡབ་ཡུམ་
གཉིས་ཀ་གསལ་སྟོང་བདེ་ཆེན་ཟུང་འཇུག་རང་བཞིན་གྱི་འོད་གསལ་བ་གཅིག་བསྒོམ། དེ་ཡང་གསལ་བའི་ངོ་བོ་ནས་མ་འདྲེས་པ་ཡོངས་སུ་རྫོགས་པ་སྟོང་པའི་ངོ་བོ་ནས་རང་བཞིན་གང་དུ་ཡང་
མ་གྲུབ་པ་འོད་ཀྱི་རང་བཞིན་དུ་བསམ་ལ། འདི་ལྟ་བུ་འདི་རང་གི་སེམས་ཉིད་ལྷ་སྐུར་སྣང་བ་མ་གཏོགས་དེ་ལས་ལོགས་སུ་ཕྱི་རོལ་གྱི་དོན་དུ་བདེན་པར་མ་གྲུབ་པར་ཐག་བཅད་
དེ་བསྒོམ། དེས་རྨི་ལམ་དང་ཆུ་ཟླ་བཞིན་དེ་ཡང་རྨི་ལམ་དུ་ཡུལ་སྣ་ཚོགས་ཞིག་རྨིས་ཀྱང་། ཡུལ་གྱིས་ཚུར་འོང་བ་ཡང་མེད། རང་སེམས་ཀྱིས་ཕར་ཕྱིན་པ་ཡང་མེད། སེམས་ཉིད་ཀྱིས་བསླད་པའི་དབང་གིས་སེམས་ཉིད་སྣ་ཚོགས་སུ་སྣང་བ་ཡིན་གྱི་དེ་ལས་ལོགས་སུ་བདེན་པར་གྲུབ་པ་མེད་དོ། །
1-138
དེས་ཆུ་ནང་གི་ཟླ་བ་ལས་ཤེས་སོ། །དེ་བཞིན་དུ་རང་སེམས་འོད་གསལ་ལྷ་སྐུ་ཤིན་ཏུ་གསལ་བ་དེ་གང་ནས་བྱོན་གང་དུ་བཞུགས། གང་ན་གནས་བརྟགས་པས་གང་ནས་ཀྱང་མ་བྱོན་གང་
དུ་ཡང་མི་བཞུགས། གར་ཡང་མི་གནས་པར་གསལ་སྟོང་ཟུང་འཇུག་སྤྲོས་པའི་མཐའ་དང་བྲལ་བར་ཐག་གཅད། དེ་འདྲའི་རང་སེམས་ལྷ་སྐུ་དང་དབྱེར་མེད་པའི་སངས་རྒྱས་འདས་པ་རྣམས་ཀྱིས་ཀྱང་མ་གཟིགས།
མ་བྱོན་པ་རྣམས་ཀྱིས་ཀྱང་གཟིགས་པར་མི་འགྱུར། ད་ལྟ་རྣམས་ཀྱིས་ཀྱང་མ་གཟིགས་སོ་སྙམ་དུ་བསྒོམ་མོ།། །།
༄། །དངོས་གཞི།
གཉིས་པ་དངོས་གཞི་ནི། སེམས་གསལ་སྟོང་རང་བཞིན་མ་གྲུབ་པ་འདི་འཆི་མེད་དུ་བསྒོམ་
པ་ལ་འཆི་མེད་སེམས་ཀྱི་དམིགས་པ་བཞི་ལས། དང་པོ་ནི་དེ་ལྟར་དུས་གསུམ་སངས་རྒྱས་ཀྱིས་མ་གཟིགས་པའི་རང་སེམས་གསལ་སྟོང་དེ་ལ་ན་བ་མ་གྲུབ་སྟེ། ན་བར་སྣང་བ་དེ་རང་
གི་ལས་ཉོན་གློ་བུར་བ་དེས་བསླད་པའི་སྣང་བ་ཡིན་གྱི་དོན་དམ་ལ་ན་བའི་རྒྱུ་མེད་དེ་མེད་པས་འབྲས་བུ་ན་བ་ཡང་མེད་དོ་སྙམ་སེམས་ན་མེད་དུ་རྟོགས་རྟོགས་བསྒོམ་མོ། །གཉིས་
པ་ནི་དེ་འདྲ་བའི་སེམས་འཆི་བ་མ་གྲུབ་སྟེ་འཆི་བ་ཞེས་པ་ལུས་བེམ་པོ་འདི་དང་རྣམ་རྟོག་གློ་བུར་བ་དེ་བྲལ་བ་ལ་བརྟགས་པ་ཙམ་ཡིན་གྱི། བརྟགས་ཤིང་དཔྱད་ན་འཕོ་བྱ་འཕོ་བྱེད་དང་བྲལ་བ་གང་དུ་ཡང་མི་བདེན་པའི་སྟོང་ཉིད་དུ་ནམ་ཐག་མ་ཆོད་བར་དུ་བསྒོམ་མོ། །
1-139
གསུམ་པ་ནི་དེ་འདྲ་བའི་སེམས་དེ་ལས་འཚང་རྒྱ་རྒྱུ་འདུག་གམ་མི་འདུག་བལྟས་པས་འཚང་རྒྱ་རྒྱུ་མེད་དོ། །སེམས་ཀྱི་དུས་དང་སངས་རྒྱས་པའི་དུས་ཀྱི་སེམས་ཀྱི་རང་བཞིན་གཉིས་འོད་གསལ་སྟོང་
ཉིད་དུ་དབྱེར་མེད་དོ། །སེམས་ཀྱི་རང་བཞིན་རྣམ་དག་དེ་གློ་བུར་གྱི་དྲི་མ་ཐམས་ཅད་དང་བྲལ་བ་དེ་ལ་སངས་རྒྱས་ཞེས་མིང་བཏགས་པ་ཙམ་ཡིན་ནོ་སྙམ་དུ་བསྒོམ་མོ། །བཞི་པ་ནི་
དེ་འདྲའི་ལྷ་སྐུ་རང་སེམས་གསལ་སྟོང་དེའི་རང་བཞིན་ལ་བསམས་ན་འཁོར་བ་མ་གྲུབ་སྟེ། འཁོར་བ་བདེན་པར་མ་གྲུབ་པས་འཁོར་བར་འཁོར་མཁན་མ་གྲུབ་སྙམ་དུ་འཁོར་བ་རང་སེམས་འཁྲུལ་པའི་
སྣང་བར་ཐག་ནམ་ཆོད་ཆོད་བསྒོམ་མོ།། །།
༄། །རྗེས།
གསུམ་པ་རྗེས་ནི་དེ་ལྟར་རང་སེམས་འཆི་མེད་དུ་ཐག་བཅད་དེ་ངེས་ཤེས་བསྐྱེད་ལ་ཡེངས་མེད་དུ་བསྒོམ། བླ་མ་ལ་གསོལ་བ་གདབ་པ་སེམས་ཅན་ལ་
སྙིང་རྗེ་བསྒོམ་པ། དགེ་བ་ཐམས་ཅད་སེམས་ཅན་ཐམས་ཅད་ཀྱི་དོན་དུ་རྫོགས་བྱང་དུ་བསྔོ་བས་བོགས་འདོན་ན། མཚམས་མེད་པ་ལྔ་བྱས་པ་ཡང་འཆི་ཁའམ། བར་དོར་འཚང་རྒྱ་ན་སྒྲིབ་པ་ཆུང་
ཞིང་སྐལ་བ་དང་ལྡན་པ་ནི་རྒྱུན་དུ་སྒོམ་པ་ལྟ་ཞོག འཆི་ཁར་སྐུ་ཡོངས་རྫོགས་སམ་ཆ་ཤས་ཙམ་གསལ་བས་ཀྱང་སྒྱོགས་ཀྱི་འཁྲུལ་འཁོར་རམ་ངང་པའི་རྫིང་དུ་རྡོ་བརྒྱབ་པའམ། ཚེས་བཅོ་ལྔའི་ཉི་མ་རྒས་པ་དང་ཟླ་བ་འཆར་བ་དུས་མཉམ་བཞིན་དུ་བར་དོར་རྒྱལ་བ་ལོངས་སྐུར་འཚང་རྒྱ་སྟེ། 
1-140
ཆོས་སྐུ་ལས་མ་གཡོས་པར་གཟུགས་སྐུ་གཉིས་ཀྱི་གང་ལ་གང་འདུལ་གྱི་སེམས་ཅན་གྱི་དོན་ལྷུན་གྲུབ་རྒྱུན་ཆད་མེད་པར་བྱེད་དོ། །དེ་ལྟ་བུའི་གདམས་ངག་མེད་པར་ལམ་བསྒྲུབ་པའི་རྩོལ་བ་ཆེར་
བྱས་ཀྱང་། ཆུ་བསྲུབས་ཀྱང་མར་མི་འབྱུང་བ་བཞིན་དུ་ངལ་བ་དོན་མེད་ཡིན་ཞིང་། འདི་འདྲ་བའི་གདམས་ངག་དང་ལྡན་ཞིང་ཉམས་སུ་ལེན་པ་དེ་ནི་མདོ་རྒྱུད་ཐམས་ཅད་ཀྱི་བཅུད་ཕྱུང་ནས་བསྡུས་
པས། ལས་ཉོན་འཁྲུལ་པའི་གཅོང་ནད་བསལ་ནས་མཁའ་སྤྱོད་དུ་འགྲོ་ངེས་པའི་གདམས་པ་ཡིན་པས་ཉམས་སུ་ལེན་དགོས་སོ། །འདི་བས་ཟབ་པའི་མན་ངག་རྒྱ་བོད་གཉིས་ན་མེད་པ་ཡིན་ནོ། །ཕོ་གྲུང་
མོ་གྲུང་བརྩོན་འགྲུས་ཅན་ཚེ་གཅིག་ལ་འཚང་རྒྱ་བའི་ཆོས་ལགས་སོ། །འདི་དག་གི་རིགས་པས་ལུས་བེམ་པོ་འདི་སེམས་གསལ་སྟོང་གཉིས་ཀ་འཁོར་བ་ནས་སངས་རྒྱས་སུ་འཆུག་མི་འཆུག སངས་རྒྱས་ནས་
འཁོར་བ། ངན་འགྲོ་ནས་བདེ་འགྲོ་སོགས་སུ་འཆུག་མི་འཆུག་བལྟས་ལ། ལུས་དང་སེམས་འཆུག་མེད་དུ་ཐག་ཆོད་ཆོད་བསྒོམ་མོ། །སྙིང་རུས་ཅན་ཚེ་གཅིག་ལ་འཚང་རྒྱ་བའི་ཆོས། ཉིང་ཁུའི་ཡན་ལག་གི་
ཆོས་སྐོར་ལས་འཆི་མེད་དང་འཆུག་མེད་ཀྱི་དམིགས་རིམ་གསལ་བ་འདི་ཡང་ལུང་སྟོང་སྨྱོན་པས་མཁའ་འགྲོའི་གསུང་བཞིན་ཉམས་སུ་མྱོང་བར་བྱས་ནས་གནས་མཆོག་རི་བོ་ཆེར་སྟག་ལོ་ཟླ་བ་དྲུག་པའི་ཚེས་བརྒྱད་ནས་བདུན་པའི་བཅོ་ལྔའི་བར་ལ་ཉིང་ཁུའི་ལུས་ཡན་དང་བཅས་པ་ཚང་བར་སྦྱར་བའི་ཡི་གེ་པ་བཀའ་བཅུ་པ་བློ་གྲོས་རྒྱལ་མཚན་ཡིན། 
1-141
༈ དམ་ཆོས་འདི་ཚུལ་བཞིན་ཉམས་སུ་ལེན་པ་ལ། ཚེ་འདིས་འཁྲི་བ་བཅད་པས་དོན་ཆེན་གྲུབ་ནས་གཏན་གྱི་བྱུས་ལེགས་འགྲོ་བ་འདུག་པས་སོ། །ཐམས་ཅད་ཀྱིས་རྩོལ་བ་སྐྱེད་ལ་རེམ།། །།

